बरे नाही…

तुझे असे हे सारखे सजणे बरे नाही,                           
आरशाशी वेळ एवढे बोलणे बरे नाही… 

तूच सांग एकदा,पुनवा कधी आहे,                           
माझे हे असे रोजचे जागणे बरे नाही…                       

'भेटूनी तुला आज सांग काय मी बोलू',                      
तुझे असे स्वत:ला समजावणे बरे नाही…                   

नजरेच्या धारेतून होऊ दे वार एकदाचा,                    
पापण्यांच्या लयीतून असे छळणे बरे नाही…              

कोरली गेली नक्षी माझ्या-तुझ्या आठवणींची,
मेहेंदीसम मनात माझ्या रंगणे बरे नाही…               

कालचे तुझे असणे किती बोलून गेले,                        
स्पर्शात शब्दाचे अंतर ठेवणे बरे नाही…                     



-- अमोल नेरलेकर