करार...

न कळे तुझा हा कोणता आकार आहे,
मज शोधायला येथे मीच फरार आहे…

पटांवरी बघ रोज खेळ द्यूताचा चाले,
मला मारायचा तुझा डाव हुशार आहे…

अनेक राजांनी हा दरबार तुझा भरलेला,
भीक मागणारा मीच एकटा महार आहे…

उगा कशाला असावा मोह नसणार्याचा,
नशिबी माझ्या फक्त साधा नकार आहे…

नको करूस माझी तुलना भल्याभल्यांशी,
द्रोणाच्या नजरेतला मी, कर्ण सुमार आहे…

पुन्हा नको उजळवूस मार्गात दिवे माझ्या,
वार्यास न अडवणे - आपला करार आहे…

-- अमोल नेरलेकर, २०.०८.२०१५

ती म्हणाली तिला भेटताना मला बरोबर घेउन चल..

'ती' म्हणाली 'तिला' भेटताना मला बरोबर घेउन चल,
म्हण ना आम्ही होतो पुढे, 'तू' ही थोडी मागून चल..

तशी माझी काही फार फार अपेक्षा नाही,
सोबत मला नेताना खूप सजव असही म्हणत नाही..
मला माहितीये तिला भेटताना तुझे मन असते रिक्त,
म्हणून सांगते तुझासोबतची थोडी जागा दे फक्त,
तुझ्या त्या क्षणांच्या आठवणी सार्या साठवून घेइन,
तू म्हणशील तितकच आणि तेवढच फक्त लिहून घेइन..
बघ तुला पटतय का..!

मला माहितीये, ती नसताना तू माझ्याशीच तासंतास बोलत असतोस..
आणि मी ही ऐकत असते तुझ्या त्या गप्पा, स्वत:ला 'ती' बनवून..
कळतो रे मला तुझा हर्ष, विरह, दु:ख, त्रास..
म्हणूनच ती आल्याचा करून देते मी तुला थोडा भास..
आता कस बरोबर असेन तर मला थोड बर वाटेल,
तुला काही मदत लागली तर मी ही लगेच तयार असेन..
बघ तुला पटतय का..!

तुम्हा दोघांच्या नजरबंधात मी सहजतेने मावू शकते..
तुम्हा दोघांच्या स्पर्शांची अलगद मिठी बरी वाटते..
तुम्हा एकमेकांच्या सहवासात मी ही तिथेच बसलेली असते..
पण तुझ लक्ष कुठे असत माझ्याकडे?
तुझ आपल नेहमीचच..तिची नजर..तिचे डोळे..
मग मलाही येतो राग..मी ही रागावते तुझ्यावर थोडी..
पण वाटत माझ्याइतकच तिच्यावरही प्रेम करणार आहे कोणी..
तुम्हाला तस एकत्र बघून खूप खूप छान वाटत..
दुसर्याच्या सुखात आनंदी असण - जीवन आणखीन काय असत?
बघ तुला पटतय का..!!

तसा हट्ट हा नेहमीच मी तुझ्याकडे करत असते,
मला सारख बरोबर ने आग्रह नेहमी धरत असते..
तुला मी अन मला तू आपण एकमेकांचे जरी सोबती,
तरीही सांगते कुठल्याही नात्यांत करू नकोस ह्याची गणती..
नाती म्हटली की आली सारी सुख - दु:ख, इच्छा, भास,
स्वत:च्याच जगण्यावरती स्व:त करून घेतलेला त्रास..
पण खर सांगते तुझ्यामुळे ह्या कडव्यान्मधून जगता येते..
एका मूर्त कागदावरून लाख हृदयांत पोहोचता येते..अमूर्त प्रेयसी बनता येते..
बघ तुला पटतय का..!!

'ती' म्हणाली 'तिला' भेटताना मला बरोबर घेउन चल,
म्हण ना आम्ही होतो पुढे, 'तू' ही थोडी मागून चल..


-- अमोल नेरलेकर, ०२.०८.२०१५